英聯盃：紐卡素近況曳曼城地頭惡拆紐最拿手_東方日報

英聯盃4強次回合大戰，曼城喺主場迎戰紐卡素，首回合「藍月亮」作客都贏2比0，證明雙方實力有一定距離，今仗有埋地利優勢，又可以睇準出擊，勝算更加高。「喜鵲」今季表現大為走樣，對住頂級球隊完全冇符，曼城睇定嚟食有望再贏多鋪，主勝放心捧場。（無綫myTV SUPER周四凌晨4時直播）文:工廠仔

曼城上場聯賽被熱刺逼和2比2，喺英超爭霸暫處下風，今季捧盃最大希望就係英聯盃，依家佢哋已經半隻腳踩入決賽，當然會認真對待。而且曼城主場威力依然強勁，對上9場主場取得7勝2和，而且全部都喺上半場已經領先，強勁氣勢有力輾壓紐卡素。

紐卡素多傷兵狀態曳
紐卡素係衞冕球隊，不過佢哋今季戰鬥力下降唔少，新加盟前鋒禾達美迪同尤尼韋沙愈踢愈沉，般奴古馬雷斯同祖連頓兩大中場上仗因傷缺陣，導致球隊中場運轉完全癱瘓，結果被利物浦大炒4比1。「喜鵲」傷兵眾多，戰鬥力唔會有太大改善，前景唔太樂觀。

紐卡素近況曳，近7場比賽只係贏得1場，包括對利物浦、阿士東維拉同曼城都輸晒，對住強隊毫無招架之力。睇埋「喜鵲」過去7次作客曼城，全部輸晒之餘仲要1球波都入唔到，其中6場輸至少2球，「格食格」味道極濃。紐卡素落後緊2球，今場別無選擇焗住要搶攻，隨時進退失據，按形勢捧曼城主勝為妙。